Okazis la Robotika Olimpiko A+D 2006

Jen eta fotoraporto pri la konkurado de robotoj okazinta la 29an kaj 30an de julio:

↑ Antaŭ la konkurado, kelkaj partoprenantoj faras lastan kontrolon pri la funkciado de siaj robotetoj en la labirinto.

↑ Kelkaj partoprenantoj kontrolas ke la programoj de siaj robotoj funkcias bone.

↑ Partoprenantoj, malantaŭ vico de robotoj, atendas la komencon de la konkurado.

↑ Konstruinto de konkuranta roboto estas intervjuata.

↑ La publiko rigardas de supre la emociigan konkuradon.

↑ La muso-formaj trofeoj atendas sur la tablo.

↑ Antaŭ ol komenci sian konkuradon en la kategorio "komencantoj", ĉiu konkuronta roboto estas preta en vico por iri al la labirinto. Ĉi tie ni vidas parton de la vico.

↑ Por kapti la tenisajn pilketojn en la labirinto, la plej noveca dezajno estis la brako de la roboteto kiun ni vidas pli proksima ĉi tie; la plimulto el la robotetoj uzis tenajlon sen tiel perfektigita brako.

AI: Ju pli ĉiea des pli nevidebla

Kelkajn jarojn antaŭe mi legis anglalingvan libron kies titolo aspektis kontraŭfakta: The Disappearance of Telecommunications ("La Malapero de telekomunikado") [ISBN 0780353870]. Mi taksis la titolon stranga -kaj tial alloga- ĉar mi vidis ke telekomunikado ĉiam estas pli kaj pli grava, do kial kaj kiel ĝia "malapero"?. Kompreneble, la libro temis pri malapero en la senco ke telekomunikado estos ĉiam kaj ĉie ĉirkaŭ ni: Estos ni konstante konektitaj kun la ceteraj homoj kaj maŝinoj, do jam ni ne bezonos konscie "konektiĝi", pasi el nekonektita stato al konektita, kiel multaj el ni ankoraŭ devas fari -des pli se nia aliro al Interreto estas per telefona reto. Saman metaforon pluraj aŭtoroj pritraktas rilate iun ajn ilon: Ilo ne estas bona se ni devas esti tre konsciaj pri la ilo mem, kaj nian antenton ni ne povas koncentri nur en la celon por kiu la ilo estis farita. Ekzemple, uzante krajonon malkomfortan, aŭ pezan, ni pensas konstante pri ĝi kaj malpli pri la skribado. Kontraŭe, ilo tre bone dezajnita kaj farita permesas ke ni koncentru nian atenton nur en la taskon, kaj do tia ilo estas kvazaŭ "nevidebla". Pri Artefarita Inteligenteco okazas simila fenomeno: Ĝi konstante progresas, kaj la teknikoj rezultintaj el tiu esplorado penetras en la ilojn kaj sistemojn kiujn ni uzas, kaj se tiuj produktoj "kun AI" (kvankam ofte oni ne mencias AI kiel ilia origino) estas vere utilaj kaj bone dezajnitaj, AI estos pli kaj pli konstante ĉie ĉirkaŭ ni, kaj paradokse ĝi estos nevidebla. Ju pli perfekta helpanto estas AI, des malpli ni bezonos pensi pri ĝi. Ekzemple, la rekono de karakterizaĵoj -ne nur en bildoj- estas ekde la jaroj 1950-aj unu el esploroj farataj en AI. Nu, jam rezultoj el tiu esplorado eniris en komercajn produktojn; jen:

• www.riya.com: Serĉilo de bildoj laŭ ilia enhavo.
• AutoStitch: Komputilprogramo por formado de panoramoj, kiu kunigas aŭtomate fotojn pri apudaj scenoj.
• Fujifilm FinePix S6500fd kaj Pentax Optio S7: Novaj fotiloj kun Vizaĝ-trovanta teknologio kiu trovas aŭtomate homajn vizaĝojn en la fotota sceno por agordi la enfokusigon kaj eksponon. (Tiun uzitan far Pentax produktis FotoNation).

Oni uzados tiujn produktojn sen pensi pri AI. Produktoj kiel tiaj estos ĉie, kaj ilia "inteligenteco" estos nevidebla, ne-pripensinda. Eble kelkaj legantoj opinias ke tie ne ekzistas inteligenteco sed "algoritmoj (plimalpli simplaj)". Nun mi ne antaŭdiskutos pri tiuj sintenoj.

Juĝado pri robotetoj

Dum la sabato 29^a kaj la dimanĉo 30^a de julio, okazos en mia urbo la 8^a robotika konkurso nomata "Robotika Olimpiko A+D 2006", organizita far la Grupo de Aŭtomatiko kaj Dezajno de la Universitato Pontifika Bolivarana. Kiel en la ĵuspasintaj du jaroj, ĝi okazos en la magazenara konstruaĵo Komerca Centro Vizcaya, kaj ankaŭ ĉi-jare mi estos unu el la juĝantoj de la konkurso. Mi raportos pri la ĉi-jaraj okazintaĵoj kiel mi faris en 2004 kaj 2005: De la jaro 2005: Pri mia nomumo kiel juĝanto, Raporto pri la unua tago, Raporto pri la dua tago De la jaro 2004: Antaŭ la konkurso, Raporto pri la unua tago, Raporto pri la dua tago.

Mia fotoblogo en Blogger

Kiel mi skribis en la ĵusantaŭa blogaĵo, provis mi la kapablojn de fotix.net. Nu, ĝi ne sufiĉe plaĉis al mi; dume, mi rimarkis ke Blogger jam estas sufiĉe bona por miaj modestaj celoj rilate fotoblogon, kaj mi jam konas la funkciadon de ĉi-lasta reteja servo. Do mi ne plu uzos fotix.net, kaj mia nova fotoblogo, aŭ fotoalbumo, al kiu mi vin invitas por rigardado kaj komentarioj, estas jam en:

http://fotitaj.blogspot.com

La nomo de tiu fotoblogo estas tre simpla: Mi sekvis la modelon de ĉi tiu blogo "Skribitaj Pensoj", la nova estas: "Fotitaj Vidaĵoj". En Skribitaj Pensoj, ankoraŭ aperos fotoj se ili helpas la komprenon pri la temo priskribita. En Fotitaj Vidaĵoj, la "temoj" estos la bildoj mem, kaj la tekstoj -etaj- helpos la komprenon de la bildoj.

Mi kaj la fotografio

Ekde multaj jaroj mi ŝatas fotografion, fari fotojn, kaj tial mi havas fotoalbumon titolita Mi kaj la Fotografio, en mia persona retejo LuisGuillermo.com.

Kaj lastatempe mia interesiĝo kreskas, mi volas dediĉi pli da tempo al fotado, mi denove legas tiutemajn librojn kiujn mi posedas. Min speciale allogas Photography for the joy of it (ISBN 0442298838), far Freeman Patterson.
Kiel parto de tio, mi ĵus komencis alian blogon nur dediĉita al fotografio aŭ "fotoblogo", por publikigi miajn bildojn. Mi komencis ĝin en servilo de fotix.net:

Fotitaj Vidaĵoj: luisguillermo.fotix.net

Mi provos kiel ĝi funkcias, kaj decidos ĉu:
1^e Daŭri tie
2^e Fari fotoblogon alie
3^e Ampleksigi kaj plibonigi mian jam ekzistantan Mi kaj la Fotografio
4^e Simple publikigi la fotojn tie ĉi, en Skribitaj Pensoj.
Kion vi konsilas?.

Vendreda humuro por la 14a de julio

AI kvindekjara

Kvankam la serĉado pri la scienca kompreno de intelekto kaj inteligenteco estas entrepreno kiu instigis multajn homojn -sciencistoj kaj filozofoj- ekde tre antikva tempo, kaj same oni povas diri pri la intenco produkti artefaritaĵojn kiuj iel similu la mensajn kapablojn de la homo, tamen oni konsideras ke la esplortemo nomata Artefarita Inteligenteco aŭ Artefarita Intelekto, kun tiu-ĉi nomo kaj kun la komputilo kiel sia taŭga ilo, naskiĝis "oficiale" 50 jarojn antaŭe, en konferenco okazinta en Kolegio Dartmouth (Hanover, New Hampshire, Usono).

Tiam, en 1956, John McCarthy kaj Marvin Minsky menciis al Claude Shannon (patro de la matematika informteorio), la ideon organizi konferencon kun pluraj homoj kiuj tiutempe esploradis la manierojn konstrui en maŝinoj kapablojn similajn al tiuj de la homa menso. Tiel, danke al 7500 usonaj dolaroj donacitaj far la Fondaĵo Rockefeller, okazis la konferenco kun aliaj esploristoj: Nathaniel Rochester, Arhtur Samuel, Allen Newell, Herbert Simon, Oliver Selfridge, Ray Solomonoff, Alex Bernstein kaj Trenchard More. La konferenco kiu akuŝis Artefaritan Intelekton utilis, ne ĉar iu prezentis grandan atingaĵon, sed por interkonado de la esploristoj kaj por iasenca kunigo de diversaj esploradoj sub tiu riĉenhava nomo (mallonge "AI") elpensita far John McCarthy. Per tiu nomo, ŝate aŭ malŝate, estas socie konata la esplortemo.
Tial, ekde hodiaŭ ĝis la sabato 15^a, oni celebras la 50 jarojn de AI per alia konferenco en la sama loko kie ĝi naskiĝis. La evento estas nomata: AI@50.

Aranĝetoj en mia blogo

Mia preferata retumilo estas Mozilla Firefox kaj ne Interreta Esplorilo. Hieraŭ, uzante la retumilon de Microsoft mi trovis problemon kiu ne aperis en Firefox, kaj kiu aperigis mesaĝon pri eraro de Javascript. Post kelke da serĉado mi trovis la kaŭzon de la problemo: En la ŝablono de mia blogo aperis voko al javaskripta proceduro "ping" kiu versajne devus alveni el retejo "pings.ws", tiu proceduro eble estis por fari aŭtomatan sciigon, al pluraj serviloj, pri novaj blogaĵoj kiujn mi skribas; tamen tiu proceduro jam ne ekzistas kaj la retejo "pings.ws" jam aperas senenhava. Do, mi forigis tiun vokon kaj la referencon al "pings.ws", kaj jam la retumilo Interreta Esplorilo ne montras erar-mesaĝon, feliĉe!.
Ankaŭ mi dediĉis iom da tempo por kontroli mian liston de ligiloj al aliaj esperantlingvaj blogoj: Unue, mi malaperigis ligilojn al blogoj kiuj jam ne ekzistas; tamen mi lasis ligilojn al kelkaj blogoj kiuj ekzistas kvankam siaj verkintoj ne plu skribis dum monatoj; kaj due, mi korektis kelkajn ligilfrazojn laŭ la nunaj nomoj aŭ titoloj de la alligitaj blogoj.

Esperanto-kongreseco kaj futbala ĉampioneco

Kvankam mi ne estas amanto de futbalo, kiel mi skribis antaŭe, mi legis prifutbalan blogaĵon de Tonyo, nur ĉar ĝi rilatis ankaŭ al Esperanto.
Kaj, Tonyo pravis: Lando kie iujare okazas la Universala Kongreso de Esperanto estas monda futbala ĉampiono tiujare. Okazis tiel pri Italio, nunjara kongreslando de esperantistoj.
Ĉu koincido utila por rimarkigi homojn pri Esperanto, en tiu-ĉi mondo plena de homoj kredantaj pri astrologio kaj similaj aferoj?.

Homoidaj robotoj kaj aviadiloj

Eklipsita far la homludita futbalo, okazis kiel mi menciis antaŭe, la futbala mondpokalo ludata far robotoj.

Kiam mi legas raportojn kaj rigardas videaĵojn pri RoboCup 2006, pri la malrapida ludo, la falemo kaj ĝenerale povra ludado de homoidaj robotoj -taksita laŭ homa ludkapablo-, venas tuj al mia memoro la malrapida kaj ĝenerale povra flugo de la flugmaŝinoj de Santos-Dumont kaj de la fratoj Wright, cent jarojn antaŭe, taksitaj laŭ la nuntempaj mirindaj aviadiloj. Pri homoidaj robotoj ni estas en nivelo komparebla al tiu de aviadiloj komence de la 20^a jarcento. Verŝajne mi, kaj aliaj frenezuloj, estas allogitaj far jarcentpostulaj celoj kiel Artefarita Inteligenteco, Homoidaj robotoj kaj la disvastigo de Internacia Lingvo konscie dezajnita.