Robotika Olimpiko A+D 2005, 1a tago

Kiel mi antaŭe skribis pri espero, nun mi fakte rakontas iomete pri la 7^aRobotika Olimpiko A+D kiu okazas hodiaŭ sabato kaj morgaŭ dimanĉo en mia urbo Medellín, kaj en kiu -kiel mi ankaŭ skribis antaŭe- mi estas unu el la juĝantoj, same kiel en la pasintjara olimpiko.
Ĉi-jare la nombro de partoprenantaj robotoj estas sufiĉe granda: 46 robotoj venintaj el diversaj kolombiaj urboj, kiuj laŭkategorie dispartiĝas jene: La konkurado en labirinto, por memkontrolitaj robotoj, havas ĉi-foje tri kategoriojn: 30 robotoj en kategorio komencantoj, 10 robotoj en kategorio altnivela kaj nur du robotoj en kategorio sperta. Morgaŭ, por la unua fojo en tiu-ĉi olimpikserio, ni havos novan konkuradon, nomata sumoo, en kiu batalos inter si paroj de radiokontrolitaj robotoj, ene de 150-centimetra cirklo: ĉiu roboto klopodos, kiel en la japana lukto samnoma: elirigi sian kontraŭulon eksteren de la cirklo kaj eviti sian propran elirigon el la cirklo.

Jen mia hodiaŭa fotoraporto:

↑ Antaŭ ol komenci la konkuradon, ĉiuj robotistoj provas siajn maŝinetojn, lastoportune.

↑ Surfaco por la morgaŭa sumoa lukto.

↑ La muso-formaj trofeoj atendas sur la tablo por la morgaŭa disdono de premioj.

↑ Antaŭ ol komenci la konkuradon en la kategorio komencantoj, ĉiu konkuronta roboto estas preta kaj atendas sian vicon por iri al la labirinto.

↑ La publiko rigardas de supre la disvolvon de la emociiga olimpiko.

↑ La konstruintoj de tiu-ĉi roboto baptis ĝin R2D2, kiel la -iomete similforma- konata roboto de filmoj de George Lucas.

↑ Konstruinto de konkuranta roboto estas intervjuata.

↑ Tiu-ĉi roboto jam sukcese trovis kaj prenis unu el la du pilkoj. Nun ĝi devas serĉi la duan.