Interese blogi pri opiniiga temo

Estas interese havi blogafiŝon kiu ne pasas sen ploro nek gloro, sed male, elvokas favorajn, kontraŭajn kaj nuancitajn sintenojn kaj reagojn el la legantaro, ĉar ĝi tuŝas temon kiu, juĝite laŭ la reagoj, estas debatinda.

Dankon al tiuj kiuj komentis miajn du ĵusantaŭajn blogafiŝojn, ne nur tie ĉi, sed ankaŭ en aliaj blogoj aŭ forumoj.

Protekti kopirajton aŭ pliatingebligi Esperanton

Inter la komentoj, ĝenerale dankaj, kiujn mia antaŭa blogafiŝo ricevis, mi trovis ankaŭ jenan, maldankan:

« Estimata,
PIV estas kopirajtita verko eldonita de SAT. Ni jam skribis al la retprovizanto por peti forigon de ĉi tiu teksto, kaj prenos pliajn paŝojn por tion atingi se necese.
Nun mi afable petas vin forigi tiun ĉi instigon al kopiado de protektita verko.
Antaŭdankas,
Vinko Markovo
Generala Sekretario de SAT »

Nu, kion mi respondas?:

1. Mi ne estas la alŝutinto de tiu, laŭ vortoj de S-ro Markovo, "protektita verko", nur mi trovis ĝin en La Reto, danke al iu sennoma esperantisto kiu, verŝajne kiel mi, volas plifaciligi la aliron de la popolo al nia kara lingvo, volas plidisvastigi Esperanton.
    
2. La komenton de SAT (Sennacieca Asocio Tutmonda), vere kaŭzas al mi dilemon:
    
   • Ĉu helpi disvastigi nian Internacian Lingvon, faciligante la aliron de la popolo al lernomaterialo kaj legmaterialo,
     aŭ
   • Ĉu malhelpi la disvastigadon tutmondan de nia kara lingvo, katenate la lernomaterialon kaj legmaterialon al sekretiga koncepto de kopirajto, de antaŭinterreta ekonomio.
      
3. Mia sinteno favora al la plej senbara disvastigo de Esperanto estis jam antaŭe esprimita ene de mia artikolo de Januaro 2003: La Interreta Ŝanco de Esperanto, publikigita en Revuo Esperanto, N-ro 1155/1 (paĝo 11a), de UEA.
    
4. Se en Esperantujo ekzistas tia politiko kiu metas barojn al la aliro al la vortaro de La Lingvo, oni facile komprenas kial Esperanto ne disvastiĝis pli rapide en la mondo, kaj kial estas malfacile ke la plimulto de la esperanto-parolantoj superu la nivelon "bonan-tagon".
    
5. Mi opinias ke Zamenhof donis obeindan kondutekzemplon kiam li (la kreinto mem) rezignis pri ĉiuj personaj rajtoj rilate la lingvon kaj metis Esperanton kiel komuna posedaĵo homara. Imagu kian estontecon povos havi "internacia lingvo" se ĝia aŭtoro ĝin protektas per kopirajto!
    
6. Tiu ĉi okazaĵo estas nur apartaĵo de tutmonda fenomeno kiun travivas —danke al, aŭ kulpe de, la teknologio— ĉiuj publikigantoj de informa materialo, ekzemple ĵurnaloj, libroj, muziko, ktp. Publikigantoj kiuj devas taŭgiĝi (kaj jam multaj tion faras) al la nova ekonomio kaj teknikaj rimedoj. Tamen, des pli grava estas tiu ĉi aparta okazaĵo kiu ne temas pri iu ajn ĵurnalo nek beletra libro, sed temas pri la vortoj, la esprimrimedo, de Esperanto, kaj plejofte ni esperantistoj strebas por senbarigi la aliron al La Lingvo, disvastigi ĝin.
    
7. Eĉ se mi ne afiŝas tiujn retadresojn, nia ŝatata Guglo jam faris sian taskon indeksi la retenhavon kaj, do, iu ajn homo kiu faras la simplan serĉon +"Plena Ilustrita Vortaro de Esperanto", eĉ intencante aĉeti la paperan libron, trovos ankaŭ tiujn adresojn. "Komuna saĝo de la homaro": Tiu, kiu serĉas, trovas.
    
8. Fine, mi kredas ke la elŝuteblo el Interreto de tiu verko (skanita nur kiel bildo, eĉ ne teksto serĉebla), verko publikigita 8 jarojn antaŭe, kaj kiu jam havas anstataŭintan presitan eldonon, PIV 2005 (kiun mi mem posedas), helpos plidisvastigi nian karan Lingvon kaj plibonigi la lingvokapablon de kelkaj esperantistoj, agoj kiuj estas gravegaj celoj de esperantisto, kaj tamen ne mallpliigos la vendadokvanton de la paperaj libroj NPIV 2002 kaj PIV 2005. Kaj, cetere, se iu celas fari negocon mondonan, Esperanto ne estas profita elekto por tio.

Malpli da blogado pro libro-tradukado

Eble mi blogos malpli ofte dum la venontaj tagoj (eĉ monatoj), ĉar, kiel mi menciis en la antaŭa blogafiŝo, mi dediĉas tempon al tradukado de hispanlingva (kolombia) libro, proksimume 360-paĝa, en Esperanton.
Pro la postuloj de tia traduka tasko, des pli mi miras pri la laboro de bonaj libro-tradukistoj ĝenerale, kaj de L. L. Zamenhof speciale, kiam nia kara lingvo estis ĵusnaskita bebo kaj li entreprenis grandegan tradukadan laboron. Kaj eĉ pli mirinda estas lia ekzemplo pro tio, ke ni disponas pri nuntempaj rimedoj (komputilo, Interreto, ktp.) kaj li tute ne!

Forgesita datreveno !

La pasintan 28an de Novembro mi forgesis skribi blogafiŝon por celebri akurate la 5-jaran datrevenon de tiu ĉi blogo, kiel mi faris plurfoje kiam tiudate plenumiĝis nova jaro. Ja, la 28an de Novembro de la jaro 2004 mi komencis mian blogadon per simpla salutmesaĝo. Kiam mi pensas pri tempopaso, mi opinias ke kiam ni pensas pri tiuj jaroj nur kiel plimalpli abstraktaj nombroj —kiel kutime ni faras— ni ne bone perceptas la daŭron. Kaj mi pensas ke tial estas utile, por plenpercepti la signifon de iu daŭro, kompari tiun daŭron kun fenomenoj aŭ procezoj kiuj estas konataj far ni, kompreneble, je skalo akorda kun la pritemata daŭro-tempo. Do, ekzemple, por la ĝisnuna daŭro de mia blogo, imagi ke iu naskiĝis la tagon kiam mi komencis blogi, ŝi estus hodiaŭ infanino 5-jara. Signifa aĝo tiu de mia blogo :)

Aŭtobuso memoriga

Eksperimento pri skribaĵo dulingva

Tio ĉi estas provo por skribi mesaĝojn en mia blogo kiujn oni povas legi en du lingvoj (metante la muson sur la teksto), ĉi-kaze: Esperanto kaj Hispana (Kastilia). Do, mi ŝatus ricevi en la komentoj viajn opiniojn pri tiu ĉi eksperimento. Se vi ne vidas la hispanan tekston kiam vi surmetas la muson, bonvole raportu kiun retumilon vi uzas. Antaŭdankon.

Tion mi faris per aliceligo de la HTMLa markilo ABBR (kies originala celo estas por klarigo pri mallongigo [anlge: "abbreviation"]), tiel ĉi:

---

<P align="justify"> 
<ABBR 
style="border-bottom: none; cursor: help" 
title=
"Esta es una prueba para escribir mensajes en mi 
blog que se puedan leer en dos idiomas (poniendo 
el raton sobre el texto), en este caso: Esperanto 
y Español (Castellano). Entonces, me gustaría 
recibir en los comentarios vuestras opiniones 
sobre este experimento. Si usted no ve el texto 
en Español cuando pasa el ratón, por favor 
repórteme cuál navegador utiliza. Gracias de 
antemano."
>
Tio ĉi estas provo por skribi mesaĝojn en mia 
blogo kiujn oni povas legi en du lingvoj (metante 
la muson sur la teksto), ĉi-kaze: Esperanto kaj 
Hispana (Kastilia). Do, mi ŝatus ricevi en la 
komentoj viajn opiniojn pri tiu ĉi eksperimento. 
Se vi ne vidas la hispanan tekston kiam vi 
surmetas la muson, bonvole raportu kiun retumilon 
vi uzas. Antaŭdankon.
</ABBR>
</P>

---

Vortaro-Blogo de John C. Wells

Aglabla surprizo estis trovi —dank'al e-planedo— novan blogon pri lingvaj aferoj:
Vortaro-Blogo de profesoro John C. Wells.
Leginda blogo.

Ĉu obsedanta blogemo?

Kvar jaroj de tiu ĉi blogo

La 28^an de Novembro de 2004 mi komencis skribi tiun ĉi blogon.
Mi esperas daŭrigi ĉi aferon dum pluraj jaroj pli.
Nun mi volas danki al la legantoj de mia blogo, kaj samtempe saluti kaj kuraĝigi miajn samtaskanojn, la esperantlingvajn blogantojn.

Mi rekomendas spritan blogaĵon

Nun mi blogas nur por inviti esperantistojn rigardi tre spritan blogaĵon de Karles [La bekbotelo]. Mi ne rezistis la deziron diskonigi ĝin:

"Gramatiko per rekta metodo"

Tri jaroj de tiu-ĉi blogo

La 28^an de Novembro de 2004 mi komencis skribi tiun-ĉi blogon. Tio estadas agado utila por praktiki la lingvon skribe, por esprimi kelkajn ideojn, kaj por rilatigi min kun kelkaj aliaj blogantoj kaj bloglegantoj. Dum tiu tempo mi rimarkis la kreskon de la nombro de esparntlingvaj blogoj. Bona afero!
Laŭ mi rimarkas, ŝajnas ke daŭrigi blogadon aktive dum kelkaj jaroj ne estas ofta afero; mi ne temas pri esperantlingvaj blogoj sed ĝenerale. Simile al kiel okazas al multaj paperaj revuoj —ekzemple kulturaj revuoj en mia lando—, kiujn entuziasmuloj unuope aŭ grupe komencas publikigi, sed kiuj nur aperas du aŭ tri fojojn antaŭ ol morti.
Mi esperas daŭrigi oftan skribadon tie-ĉi.

Ĉu via ofta demando?

Ĉu vi jam blogis hodiaŭ ?

BlogSvarmo.blogspot.com

Kelkajn tagojn antaŭe mi legis pri la ekzisto de www.feevy.com; do, per ĝi, iom lude kaj eksperimente mi kreis paĝon kiun mi nomis BlogSvarmo:
http://blogsvarmo.blogspot.com.

Mia blogo atingis dujaran aĝon

Mi rememoris ke mi komencis tiun-ĉi blogon en novembro de 2004, sed mi ne estis certa pri la preciza dato, do mi rigardis la arkivon kaj vidis ke mi naskis ĝin la 28^an de novembro. Same ol en la jaro 2005, kvankam kelkajn tagojn malfrue, mi volas rememorigi tiun daton kiam mi decidis komenci la blogon per tiu unua saluto.

Kreu vian propran E-planedon

Eble vi konas E-planedon. Mi trovis servon de Netvibes kiu permesas tre facile krei vian propran kolekton de enhavo el viaj selektitaj (esperantlingvaj, mi esperas) blogoj. Simple: metu nomon por via kolekta paĝo, kaj poste klaku la supran maldekstran ligon "Add my feed" (en la anglalingva versio), kaj enmetu la adreson (URL) de ĉiu ŝatata blogo, unu post unu. Por tio vi povas kopii tiujn adresojn el la listo aperanta dekstre ĉe mia blogo. Ĝi aŭtomate trovas la daten-nutron (ATOM, RSS, ktp) por ke vi elektu unu. En ĉiu nova skatoleto aperas la titloloj de la lastaj blogeroj. Vi povas forigi skatoletojn kiuj ne interesas vin klakante en ikso kiu aperas supre dekstre en ĉiu skatoleto kiam la musmarko estas tie. Mi nur ĵus trovis tion, rimarkis la facilecon, kaj volis diskonigi tion al miaj legantoj. Jen la adreso: www.netvibes.com

Mia fotoblogo en Blogger

Kiel mi skribis en la ĵusantaŭa blogaĵo, provis mi la kapablojn de fotix.net. Nu, ĝi ne sufiĉe plaĉis al mi; dume, mi rimarkis ke Blogger jam estas sufiĉe bona por miaj modestaj celoj rilate fotoblogon, kaj mi jam konas la funkciadon de ĉi-lasta reteja servo. Do mi ne plu uzos fotix.net, kaj mia nova fotoblogo, aŭ fotoalbumo, al kiu mi vin invitas por rigardado kaj komentarioj, estas jam en:

http://fotitaj.blogspot.com

La nomo de tiu fotoblogo estas tre simpla: Mi sekvis la modelon de ĉi tiu blogo "Skribitaj Pensoj", la nova estas: "Fotitaj Vidaĵoj". En Skribitaj Pensoj, ankoraŭ aperos fotoj se ili helpas la komprenon pri la temo priskribita. En Fotitaj Vidaĵoj, la "temoj" estos la bildoj mem, kaj la tekstoj -etaj- helpos la komprenon de la bildoj.

Aranĝetoj en mia blogo

Mia preferata retumilo estas Mozilla Firefox kaj ne Interreta Esplorilo. Hieraŭ, uzante la retumilon de Microsoft mi trovis problemon kiu ne aperis en Firefox, kaj kiu aperigis mesaĝon pri eraro de Javascript. Post kelke da serĉado mi trovis la kaŭzon de la problemo: En la ŝablono de mia blogo aperis voko al javaskripta proceduro "ping" kiu versajne devus alveni el retejo "pings.ws", tiu proceduro eble estis por fari aŭtomatan sciigon, al pluraj serviloj, pri novaj blogaĵoj kiujn mi skribas; tamen tiu proceduro jam ne ekzistas kaj la retejo "pings.ws" jam aperas senenhava. Do, mi forigis tiun vokon kaj la referencon al "pings.ws", kaj jam la retumilo Interreta Esplorilo ne montras erar-mesaĝon, feliĉe!.
Ankaŭ mi dediĉis iom da tempo por kontroli mian liston de ligiloj al aliaj esperantlingvaj blogoj: Unue, mi malaperigis ligilojn al blogoj kiuj jam ne ekzistas; tamen mi lasis ligilojn al kelkaj blogoj kiuj ekzistas kvankam siaj verkintoj ne plu skribis dum monatoj; kaj due, mi korektis kelkajn ligilfrazojn laŭ la nunaj nomoj aŭ titoloj de la alligitaj blogoj.

Ofteco de "Esperanto" en blogoj

Nombro da blogaĵoj ĉiutage kiuj enhavas la vorton "Esperanto" dum la lastaj 365 tagoj.

Oni povas vidi la nombron da mencioj de la vorto "esperanto" en blogoj dum la lastaj 365 tagoj, laŭ statistiko de Technorati.com, per la sekvanta ligilo: http://snipurl.com/esperantoenblogoj

Dankon, karaj gratulintoj

Mi esprimas mian elkoran dankon al ĉiuj legantoj kiuj sendis gratulojn okaze de mia unua jaro kiel bloganto.
Mia intenco estas daŭrigi mian blogadon dum multaj jaroj. Mi trovas ke tio estas bona praktikado: Por verkado de legeblaj kaj legindaj artikoloj oni estas devigata ampleksigi sian personan vortaron kaj plibonigi sian skribstilon por pli bone komuniki siajn ideojn.