Alberilyn Einsteinroe

Kuriozaĵo: Mi trovis tiun-ĉi bildon en Interreto. Rigardita de proksime ĝi similas iome al Albert Einstein, tamen, se vi rigardas de malproksime (ekzemple de 3 aŭ 4 metroj disde via komputilekrano) ĝi similas pli al Marilyn Monroe.
La nomon "Alberilyn Einsteinroe" mi elpensis.
Origine: Artikolo "Hybrid Images" en revuo "New Scientist" de 2007.03.31 (laŭ: "SHAFE - Short History of Art For Everyone", kie oni trovas ĝin grandan.

Gerda Taro

Kia peko!, La tento por aĉeti libron estas io foje nerezistebla.
Tio okazis novan fojon. Post fini la legadon de Inteligencia Intuitiva (vidu ties blogeron), mi atingis la novan libron Gerda Taro / fotógrafa de guerra ("Gerda Taro, fotistino pri milito"), [ISBN 978-8483067024], skribita far Fernando Olmeda Nicolás. La virino pritraktita en tiu biografio, kunulino de fotisto Robert Capa, vokis mian interesatecon ekde kiam mi legis etan biografion pri ĉi-lasta fotoĵurnalisto (Robert Capa / imágenes de guerra [ISBN 9583019054]), do, kiam mi ekvidis la novan libron ĵus aperinta en la librejo de mia universitato, tuj mi volis akiri ĝin.
Legante pri Robert Capa, mi profitis la okazon por verki pri li en Vikipedio, kaj ekde tiam mi volis verki tie artikolon pri Gerda Taro. Baldaŭ alvenos tiu oportuno.
ĜISDATIGO DE 20071107: Promeso plenumita: artikolo pri Gerda Taro verkita en la Vikipedio.

Nadja Auermann

Kiel admiremulo pri belaj longaj virinaj kruroj, mi miris legante ke Nadja Auermann estas 180 centimetrojn alta, el kiuj 114 cm estas kruroj. Sed poste, iom pikita far kuriozemo pri la temo, mi trovis informojn pri alia longkrura virino, ankaŭ germana: Vera Gafron

Ludante kvazaŭ paparaco

Mi eliris kun mia fotilo kaj kaŝite praktikis fotadon el malproksime kvazaŭ se mi estus paparaco. Granda diferenco kun la veraj paparacoj estas ke miaj fotitoj ne estas famaj:

Naskotago de Laplace kaj de Noether

Antaŭe mi skribis pri libro far Pierre-Simon de Laplace kiun mi aĉetis en librofoiro. Nu, mi volas rememori kaj rememorigi al la legantoj ke la venonta ĵaŭdo, 23a de Marto, estos datreveno de la naskotago de tiu franca matematikisto, Pierre-Simon de LAPLACE, sed ne nur lia: ankaŭ de germana matematikistino Emmy NOETHER. Pierre-Simon LAPLACE naskiĝis en tiu-ĉi dato, 257 jarojn antaŭe, kaj mortis en Francio la 5an de Marto de la jaro 1827. Li havis ampleksajn interesiĝojn, sed kontribuis precipe en astronomia mekaniko kaj en teorio de probabloj; pri la unua temo li publikigis libron Exposition du systeme du monde kaj la kvin-voluman verkon Traité de Mécanique Céleste, aperinta inter 1798 kaj 1825. Lian profundan fidon pri la leĝoj de mekaniko li esprimis per jenaj vortoj: "Iu intelekto kiu en iu momento konus ĉiujn fortojn kiuj animas Naturon, kaj ankaŭ la situaciojn proprajn de la estaĵoj kiuj ĝin komponas, se ankaŭ estus sufiĉe ampleksa por analizi tiujn datumojn, povus enpreni per ununura formulo la movojn de la plej grandaj korpoj de la universo kaj tiujn de la plej leĝera atomo; nenio ŝajnus dubinda al tia intelekto, kaj tiel la estonteco samkiel la pasinteco ĉeestus antaŭ siaj okuloj." Do, li pensis determinisme, sed konscia pri ke la homo nur alpoksimiĝas al tia ĉioscia "intelekto", li kredis ke la homa scio nur estas dubanta alproksimiĝo al la vero, kaj ĉi-lasta penso instigis lin ekstudi la fenomenojn de probableco. Emmy Amalie NOETHER naskiĝis 124 jarojn antaŭe en Germanio, kaj mortis la 14an de Aprilo de 1935 en Usono. Albert EINSTEIN, en letero al David HILBERT -kun kiu ŝi laboris-, opiniis ke ŝi havis "penetrantan matematikan penson". Ŝi, kies patro kaj frato ankaŭ estis matematikistoj, laboris pri grupoj: precipe pri koncepto de simetrigrupoj kaj nekomutaj aŭ ne-abelaj grupoj. Ŝi pruvis teoremon (nomata Teoremo de Noether) kiu estas utila en fiziko kaj kiu en simplaj vortoj diras ke kiam simetrigrupo priskribas la konduton de fizika fenomeno, tiam ekzistas iu kvanto -ligita al tiu fenomeno- kiu konserviĝas. Ekzemple, energio estas la konservita kvanto en kelkaj procezoj .

Al lernejo kun erotikaj kajeroj

Nun estas tempo kiam studentoj kaj gepatroj de lernejanoj devas aĉeti librojn kaj aliajn lernilojn por la studjaro kiu komenciĝas. Nu, la kajeroj por la lernantoj nun kreas diskutadon en mia lando ĉar ĉiujare la eldonejoj, kiel Norma, El Cid, Kimberly, kaj D'vinni (ĉi-lasta en asocio kun revuo Soho), lanĉas al la merkato kajerojn kun ĉiam pli kaj pli erotikaj kolombiaj modelinoj en la kovriloj. Kompreneble la lernantoj ŝatas tiajn kajerojn, sed multaj gepatroj kaj lernejestroj ne ŝatas tiajn kajerkovrilojn. La konkurado en la merkato estas forta, la antaŭaj kajeroj sen fotoj en la kovrilpaĝoj aŭ kun malpli allogaj fotoj havas malfacilan vendadon: Ju malpli da vestaĵoj, des pli da vendado.
Se vi alklakas la sekvantajn ligilojn, vi komprenos kial la kajeroj kun fotoj de tiuj modelinoj, belecreĝinoj kaj aktorinoj estas preferataj de la lernejanoj kaj studentoj:
Natalia PARÍS (la plej fama kolombia modelino, kaj unu el la unuaj kiuj aperis sur kajerkovriloj), Consuelo GUZMÁN PARRA, Johana CURE, Viña MACHADO, Natalia DURÁN, Ana Sofía HENAO, Sharick LEÓN, Carolina CRUZ.

Sepa de novembro: naskitaj du fizikistinoj

Hodiaŭ, 7^a de novembro, estas datreveno de la nasko de du sciencistinoj elstaraj en fiziko: Marya SKŁODOWSKA, pli konata per ŝia franclingva nomo kaj la familinomo el ŝia edzo: Marie CURIE, kiu naskiĝis en Varsovio, Pollando, en 1867, kaj Lise MEITNER, kiu naskiĝis en Vieno, Aŭstrio, en 1878.

Marie Curie ricevis du Nobel-premiojn: pri fiziko en 1903 (kune kun sia edzo Pierre CURIE, kaj kun Henry BECQUEREL) pro pionireca esplorado pri radioaktiveco, kaj la premion pri kemio en 1911 pro la eltrovo de la elementoj radiumo [atomnumero 88] kaj polonio [atomnumero 84]. La nomo "radioaktiveco" estis inventita far ŝi, kaj pri tiu fenomeno ŝi publikigis libron en 1910.
Lise Meitner estis unu el la unuaj homoj esplorantaj la fision de atomnukleoj. Ĝenerale oni konsideras nejustan la fakton ke la Nobel-premia Komitato ne donis ankaŭ al ŝi la premion donita al ŝia kunlaboranto Otto HAHN. Simile al Marie Curie, sed pli serioze, Lise Meitner devis elteni kontraŭvirinan diskriminacion, ekzemple: dum siaj unuaj jaroj de esplorado ŝi eĉ devis labori en malnova metiejo ĉar oni malpermesis al ŝi eniri laboratoriojn kie viroj laboris. Ankaŭ, pro sia judeco, ŝi devis fuĝi el Germanio al Svedio, en 1938, pro la nazia persekutado.
Sinjorino Curie mortis pro leŭkemio en sanatorio ĉe la francaj Alpoj, la 4^an de julio de 1934, kaj sinjorino Meitner mortis en Kembriĝo [Cambridge], Britio, la 27^an de oktobro de 1968.
Ambaŭ fizikistinoj rimarkinde sukcesis elstari en tempo kiam la proseksa diskriminacio estis eĉ pli forta ol nuntempe.
En Vikipedio vi povas legi plu pri Marie Curie kaj pri Lise Meitner.