Ĉu homoida roboto funkcias pli bone ol ne-homoida?

Okaze de mia lasta blogero pri la roboto ASIMO, leginto ::júbilo::haku:: faris la demandon kiu nun titolas ĉi tiun blogeron hodiaŭan, ĉar mi juĝis ke la respondo devas esti iome longa kaj ĝi meritas ne esti "kaŝita" en la komenta sekcio sed esti blogero.

Kompreneble, la homa korpo ne estas la plej taŭga fizika formo por ĉiuj taskoj. Kelkaj taskoj estas eĉ nefareblaj por homa korpo, kaj tiam specialaj formoj de robotoj estas pli bonaj. Tamen, pri la homoida korpo, jen tri gravajn aferojn:

• Ĝi estas pli taŭga por taskoj kiuj postulas utiligi ilojn kaj maŝinojn kutime stiritaj far homoj (martelo, ŝraŭbilo, traktoro, aŭtomobilo, ktp ...). Tio malfermas multajn eblojn, kaj tiel homforma roboto estas iusence "universala" roboto, ĉar iloj/maŝinoj por homa uzado svarmas.
• Dum la disvolvado de homoidaj robotoj, la esploristoj lernas multon pri la moviĝo de la homa korpo (homa biomekaniko) kaj eĉ disvolvis eksterskeletojn (mekanikajn konkojn, kaj similajn helpilojn) por faciligi al homo fari tro pezajn taskojn. Vidu: [Honda], [Toyota]. Tio ankaŭ helpas disvolvi pli bonajn kaj "inteligentajn" protezojn.
• Se homoj kutime ajuĝas personecon kaj animstaton al maŝinoj ("Mia automobilo estas kontenta", "Mia komputilo ĉagreniĝis"...), des pli estas tiel se la maŝino estas homeca forme. Bonvole legu mian blogeron pri tiu psikologia reago. La homo aljuĝas ian kunsenton (angle: "empathy", hispane: "empatía") al homoida roboto, kian homo ne aljuĝas al aliforma maŝino. Tio, espereble, iel "naturaligos" la rilatojn inter homoj kaj tiuj mekanikaj helpantoj en la hejmo kaj aliloke.