Fritz venkis sur Kramnik: 4-2

En la ludado pri kiu mi skribis antaŭe, inter Vladimir Kramnik kaj la komputilprogramo Deep Fritz 10, fine venkis la komputilo: El la ses matĉoj, la komputilo venkis en du kaj la ceteraj kvar estis senvenkaj. Nun kaj estontece plejoftiĝas la opinio ke ŝakludo inter maŝino/programo tia kaj homo jam ne estos interesa el vidpunkto de konkurado. Tiaj maŝinoj kaj programoj estas utilaj por ke la homoj lernu plu pri ŝako, praktiku kaj perfektigu sian kapablon por ludoj kontraŭ aliaj homoj. La espero venki tiajn maŝinojn estos pli kaj pli vana. Sed ne malesperu!: Ne finiĝis la estonteco de ŝako. Verŝajne la ludo daŭre altiros la interesiĝon de homoj. Kaj mi akordas kun tio kion skribis raportisto Richard C.S. Kinne, kion mi tradukas el la angla lingvo: "La homa Tutmonda Ŝaka Ĉampionado daŭros sendamaĝe. Homoj daŭre emociiĝos ĉe la konkurado inter aliaj homoj en tiu-ĉi antikva ludo. Fakte, estas planite ke Kramnik defendos sian titolon en Tutmonda Ĉampionada turniro en Novembro de 2007. Sed en la malantaŭo de nia menso, ni scios nun ke la reala Tutmonda Ĉampiono estas tiu eta skatolo, ĉe la angulo, zumanta dum ĝi analizas la movojn de siaj subranguloj."