"La Espero" grafike, per Wordle

Ankaŭ mi ne rezistis la tenton uzi wordle.net laŭ diskonigo far la blogo Mojose. Kaj jen grafikaĵoj de "La Espero" (En la mondon venis nova sento ...); alklaku por pli grandajn:

Sistemdinamiko de la nuna ekonomia krizo

Almenaŭ ekde la esploroj de Norbert Wiener (Cibernetiko) kaj de Jay W. Forrester (Sistemdinamiko), oni scias ke la homa menso estas tre ofte trompita kiam ĝi rezonas pri kompleksaj rilatoj kiel la sociekonomiaj sistemoj, kun multaj variabloj kaj retrokuplaj bukloj —per kiuj variablo influas sur sin mem tra aliaj variabloj—. Foje ni nur konsideras mense malmultajn variablojn kaj simplajn linearajn rilatojn inter ili. Oni diras ke la sistemo tiam kondutas kontraŭ nia intuicio. Eble la analizoj kiujn ni aŭdas nun pri la financa aŭ ekonomia krizo estas tro simplaj kaj facilanime kulpigas ion/iun kiel la kaŭzo. Mi imagas ke en kelkaj ekonomikaj esplorejoj jam ekzistas la kapablo uzi pli bonajn matematikajn modelojn kaj komputilan simuladon kiu helpu nin kompreni pli bone kial, ekzemple en la simpla buklo kiun mi montras supre, Ĉiu variablo komencis malkreski, en la tuta planedo, portante la sekvantan variablon ankaŭ al malkresko, kaj rezulte la sistemon pli kaj pli proksima al halto. Povus rezulti ke, ekzemple, la rapida teknologia progreso (Interreto, poŝtelefonoj, ... ktp.) havas ankaŭ parton de la "kulpo" tra kompleksaj rilatoj inter variabloj sociaj kaj ekonomiaj.

ALDONAĴO de 2009.02.23: Rilataj ligiloj (ne esperantlingvaj):

• Kredita krizo ne devas sufoki agadon pri la klimatŝanĝo.
• Evoluada prespektivo pri ekonomiko.
• Modelo pri la financa krizo de la usona loĝeja merkato.
• Komputila modelo de Bernanke en 1980aj jaroj antaŭvidigis krizon.

Samtempa grefto de koro kaj pulmoj en Medellín

En nia urbo, la scienca nivelo de medicino estas tre bona, kaj foje ĝia kosto, kompare kun aliaj landoj, allogas al eksterlandanoj por veni kaj havi ĉi tie sian kuracadon. La ĵuse nova rimarkindaĵo tiurilata estas la samtempa grefto de koro plus pulmoj, farita en la Clínica Cardiovascular Santa María [Kardiovaskula Kliniko Sankta María], en la korpon de David Jiménez Castañeda, junulo 15-jara kun denaska kora difekto kiu poste damaĝis ankaŭ la pulmojn. La skipo de specialistoj estis direktita far D-ro Juan Camilo Jaramillo. En tiu kliniko oni jam faris 274 greftojn de koro (la unuan en 1985) kaj 47 de pulmoj (la unuan en 1997).

NUNTEMPIGO de 2009.02.02: Bedaŭrinde, mi devas rakonti ke la junulo ricevinta la organojn mortis. Oni sciis ke post la operacio, la sano de la junulo evoluis kontentige dum la unuaj kvin tagoj, kaj tial oni translokigis lin el Ĉambro de Intensa Flegado (daŭroflegejo) al Ĉambro de Speciala Flegado. Tie, li sukcesis progresi en taskoj kiuj antaŭe estis pli malfacile faritaj per si mem, ekzemple: manĝi, eksidi, kaj sin purigi. Tamen, poste aperis subita kaj forta netolero kontraŭ la engreftitaj pulmoj, kio kaŭzis la afliktantan rezulton.

Obama monhelpas al mortigo de beboj

Kaj nun, en sia freneza ŝanĝemo, la "humanisma" Barack Hussein Obama anoncis monhelpon al grupoj kiuj disvastigas la mortigadon de beboj. Kaj tiun monon dum ekonomia krizo kaj mona malabundo!

Unu el multaj ligoj [anglalingva].

Kien guantanamanoj ?

Kion faros Barack Hussein Obama kun la "anĝeletoj" eligotaj el la guantanama malliberejo?

Hieraŭa prelego pri la Granda Koliziigilo de Hadronoj

Hieraŭ, je la 6:30 ptm, mi prelegis denove pri la Granda Koliziigilo de Hadronoj, en la urba planetario. La ĉeestantaro estis proksimume 40 homoj, ili ŝajnis kontentige interesitaj pri la temo, kaj ŝatis la prezenton. Mi metis la nunan version de la prezentaĵo —kiu estas iom mallongigita ol la antaŭa— en la reton. Vi povas elŝuti ĝin el: http://luisguillermo.com/LHC/LHC_por_LGRR_version-2.pps Kompreneble, ĝi estas hispanlingva.

Ju pli granda espero ...

Ju pli granda (ĉu troa?) espero, des pli granda risko de posta seniluziiĝo.

Rilato de Paul Dirac kun Esperanto

Mi ĵus legis en angla lingvo recenzon pri la libro "The Strangest Man" [ISBN-13: 9780571222780], far Graham Farmelo, kiu temas pri la vivo de fizikisto Paul Dirac. Tie oni legas ke li estis "pioniro de Esperanto".
Ĉu iu leganto konas detalojn pri la rilato de tiu fizikisto kun Esperanto?.

KOREKTIGO: Mi pardonpetas al legantoj. Kiel evidentiĝis per la du unuaj komentoj, mi faris fuŝan, senzorgan, supraĵan, legon de la koncernaj frazoj!. Laŭ la teksto, la fizikisto estis filo de "pioniro de Esperanto"

Mi apogas Israelon

En tiu ĉi malfacila tempo por la Israelaj popolo kaj registaro, kiam la amaskomunikiloj plajparte ŝajnas apogantoj de Hamas, ignorante la atakojn kontraŭ Israelo, mi deziras esprimi mian admiron —ekde jarojn antaŭe— al la Israela popolo kaj ĝia mirinda progreso malgraŭ baroj, malfacilaĵoj kaj malamikoj.
Se oni atakas povan leonon per ungo-tondilo, estas stulte pensi ke la leono respondos per alia ungo-tondilo.