Iom pri matematiko

Unu el la temoj de matematiko kiu multe allogas min estas la koncepto "infinito" aŭ "nefinio"; tial mi havas kiel unu el miaj preferataj intelektoj al Georg Cantor, kiu eble plej kontribuis al la temo. Do, ĉi-matene, kiam mi vizitis la librovendejon de mia universitato, surprizis min agrable eltrovi libron "Un paseo finito por lo infinito: El infinito en Matemáticas", (ISBN 978-9586839372, "Finia promeno tra infinito: Infinito en matematiko") far Iván Castro Chadid kaj Jesús H. Pérez Alcázar, publikigita far la eldonejo de la Pontifika Universitato Javeriana de Bogoto. La libro prezentas la konceptojn, esplorojn kaj skolojn pri infinito laŭ historia ordo, ne nur rakonte, sed kun sufiĉa matematika nivelo. Do, mi decidis aĉeti ĝin.

Mi profitas la okazon por skribi pri la antaŭlasta libro aĉetita, pri matematiko ankaŭ: "Álgebra multilineal", (ISBN 978-9586559823, "Plurlineara algebro") far Regino Martínez-Chavanz, publikigita far la eldonejo de la Universitato de Antjokio de Medellín. La libro estas skribita por doni grandan matematikan bazon por fizikistoj. Bona afero de la libroj el universitataj eldonejoj, kompare kun tiuj de "pli komercaj" eldonejoj, estas ke la unuaj estas pli malmultekostaj, kvankam bonkvalite presitaj kaj binditaj, kaj ofte ili povas esti skribitaj en pli instruiva stilo.

Kaj profitante la temon, mi deziras rakonti al legantoj ke mia urbo, Medellín, estos sidejo de la ĉi-jara (16a) Nacia Kongreso pri Matematiko, de julio 16a al 19a. Mi aldonas ke nia nuna urbestro, Sergio Fajardo Valderrama estas matematikisto, kaj la pasinta —kaj (laŭ opinisondoj) favorata kiel venonta urbestro— Luis Pérez Gutiérrez, ankaŭ havas specialiĝon pri matematiko.

Retumilo "Safari 3.0.2" por Vindozo

Vidu unue aktualigon de la 25a de junio de la blogero Retumilo "Safari" por Vindozo.

Feliĉe, mi trovas ke tiu nova versio funkcias bone. La problemoj kiujn mi raportis pri Safari 3 en mia XP Vindozo jam ne ekzistas en Safari 3.0.2. Mi rimarkas ke la literoj de la paĝoj estas iom pli nigraj ol en Firefox kaj Explorer.

Ĉu vi jam blogis hodiaŭ ?

Kie estas volo, tie estas vojo

Amiko sendis tiun-ĉi ekzemplon, pri dancisto de salso:

Artikoleto en ĵurnalo

Hodiaŭ aperis eta artikolo mia en ĵurnalo El Colombiano de mia urbo.
En la reto, la artikolon vi trovas per jena ligilo:
Ĉu eblas ia etiko por aŭtonomaj robotoj?
Hispanlingve: "¿Cabe una ética para los robots autónomos?".
Kompreneble, pri tiom diskutebla temo, tiel eta artikoleto nur povas tuŝeti la surfacon.

Retumilo "Safari" por Vindozo

Mia unua persona komputilo estis Commodore 64. Mi ankaŭ uzis iomete etan nigran komputilon ZX81 de la angla entrepreno Sinclair kiun amiko posedis. Poste mi fariĝis "makintoŝano", kaj posedis tri modelojn de komputiloj Makintoŝo, unu post alia, kiel mi jam rakontis. Nur plurajn jarojn poste mi "falis" en la Vindozajn komputilojn. Do, kiel ankoraŭ "makintoŝema" en animo, mi nun ekprovos la retumilon Safari de Apple kiu ĵus aperis ankaŭ por Vindozo. Oni povas atingi ĝin el: http://www.apple.com/safari/. Ĝis nun, mia preferata retumilo estas "Firefox" kaj mi evitas la uzon de "Explorer".

Aktualigo afiŝita la 12an de Junio de 2007: Mi nun raportas ke bedaŭrinde la programo Safari, en mia XP-sistemo misfunkcias: Ne aperas tekstoj de menuoj (nur aperas la bildoj), ĝi ne permesas ke oni skribu adresojn de paĝojn, subite montras erar-mesaĝon kaj finiĝas. Malbone!, kiam mi esperis bonan funkciadon ...

Aktualigo afiŝita la 25an de Junio de 2007: Nu, ĵus mi legis pri nova versio: 3.0.2, kiu, krom korekti kelkajn sekurecajn fuŝaĵojn, versajne ne havos la problemojn pri kiuj mi raportis, laŭ artikolo en iTWire, ekzemple: finiĝo kiam oni intencas tajpi tekston... Mi provos tiun-ĉi version.

Libro "La privilegio esti fizikisto"

Estas bone ke mi finis la instruadon de la unua jarduono en la universitatoj, kaj tial mi havas iom pli da tempo por legi kaj por blogi, antaŭ ol komenci la taskojn de la dua jarduono. Do, ne estas hazarde ke tiuj du agoj —legi kaj blogi— reflektiĝas ĉi-tempe en miaj pli oftaj blogaĵoj pri libroj kaj legado. Mi havas kelkajn librojn en vico por esti priskribataj. Du semajnojn antaŭe, kiam mi prunteprenis el biblioteko biografion pri Richard Feynman, por pretigi estontan prelegon, mi ne povis rezisti la "tenton" pruntepreni ankaŭ la anglalingvan verkon "The privilege of being a physicist" ("la privilegio esti fizikisto", ISBN 0716719827) far Victor Weisskopf, kio estas kolekto de eseoj kun iom simila karaktero al tiuj de la verko de Werner Heisenberg kiun mi menciis en alia blogaĵo. Koincide mi trovis ke Heisenberg mem estas la temo de la 12-a ĉapitro de la verko de Weisskopf. En la libro estas interesaj pripensoj, ne nur pri fiziko sed pri scienco, teknologio, socio kaj iom da membiografio. Ĝiaj 16 eseoj aŭ ĉapitroj estas grupigitaj en kvin partojn: 1-La vivo de sciencisto, 2-Scienco kaj kulturo, 3-Ideoj en fiziko, 4-Du fizikistoj (pri Wolfgang Pauli kaj pri Heisenberg), kaj 5-Scienco kaj socio. Sinteze: Leginda 18-jaraĝa verko.

Plia simpla roboto infaneska

Post skribado de mia lasta blogaĵo pri la infaneska roboteto CB2, mi ekkonis pri la ekzisto de alia: temas pri "Kaspar", kies celo estas studi precipe la gestan interagon inter homo kaj roboto, speciale kun infanoj. La nomo korespondas al komencliteroj de angla frazo: "Kinesics And Synchronisation in Personal Assistant Robotics", kaj pri la projekto vi povas legi (anglalingve) en retejo de la Universitato de Hertfordshire: http://kaspar.feis.herts.ac.uk/ Tie estas video (de proksimume 17MB): http://kaspar.feis.herts.ac.uk/video/Kaspar.mpg Kiam mi skribas "simpla" en la titolo, mi koncernas gian inteligentecon, kompare -ekzemple- kun Asimo.

Infaneska homoida roboto

El la unuaj temoj pri kiuj mi raportis en tiu-ĉi blogo estis la homoidaj robotoj, pri kiuj mi havas specialan intereson. Jen: ligilo al listo de antaŭaj artikoloj. Sed pri tiu-ĉi temo, lastatempe mi ne kaptis rimarkindajn novaĵojn kiuj estu priblogindaj miatakse. Sed nun, pere de japana ĵurnalo Ĵomiuri Ŝimbun, mi ekkonis ke la Japana Scienca kaj Teknologia Agentejo prezentis hieraŭ al ĵurnalistoj sian infanaspektan roboton CB2, kiu estas 1.3 metrojn alta, kaj pezas 33 kilogramojn. La nova infano roboto enhavas 51 movigilojn kaj utiligas kunpremitan aeron, kio kapabligas ĝin por fari kompleksajn movojn milde. En sia fleksebla griza haŭto, CB2 havas 200 tuŝajn sentilojn. Longan vivon kaj intelektan progreson por la ĵusnaskito kaj ĝiaj eventualaj gefratoj! Jen du videoj el japana televido pri CB2, per YouTube: