46 Jaroj de homa spacveturo

Mi ĉiam ĝojas trovante novajn blogojn en La Internacia Lingvo, kaj metante ligojn al ili en mia blogo. Nu, tio okazis kiam mi ĵus trovis La Spacon de Svetlana: Ridetu kaj Lernu!, kun la kroma ŝato mia pri la temo de ŝia lasta blogaĵo: memorigo pri rimarkinda fakto en historio de tekniko. Jen: la spaca flugo de Jurij Alekseeviĉ Gagarin, la 12^an de aprilo de 1961. La foto kiun mi montras estas prenita el mia eta kaj malnova Soveta Enciklopedio pri Kosmonaŭtiko, kiun mi menciis ankaŭ en alia blogaĵo. Bedaŭrinde, li mortis la 27^an de marto de 1968 en avidila akcidento dum trejnoflugo. Post li, la dua kosmoveturanto estis German Stepanoviĉ Titov (filo de esperantisto Stepan Titov) kiu flugis inter la 6^a kaj 7^a de augŭsto de 1961; lia flugo daŭris 25 horojn kun pli ol 17 rondiroj ĉirkaŭ nia planedo. Restu en nia memoro tiuj pioniroj.

"A" estis por "usona", nun por "antaŭeniro"

Dum la pretigado de mia lasta prelego pri A.I. prezentita la 3^an de aprilo, estis por mi novaĵo trovi ke la AAAI, "Amerika Asocio por Artefarita Inteligenteco" (kie "amerika" signifis "usona") ĵus la 1^an de aprilo ŝanĝis sian nomon, sed ne sian mallongigon, al "Asocio por la Antaŭeniro de Artefarita Inteligenteco". Vere, tiu asocio —de kiu mi mem estis membro ekde 1983 ĝis 1989— jam estis sufiĉe "internacia", kaj do la nova nomo estas tute taŭga.

La venontan mardon mi prelegos

La venontan mardon, 3^a de aprilo, mi prelegos por ĝenerala publiko pri Artefarita Inteligenteco, je la 6:30 ptm. en salono de la loka urba planetario. La plena oficiala nomo de la loko estas: Planetario de Medellín, Jesús Emilio Ramírez González, honore al elstara kolombia pastro katolika, geofizikisto, sismologiisto kaj profesoro, naskita en 1904 kaj mortinta en 1981. Kvankam la dato de la prelego ne estas tre bona ĉar multaj homoj ferias ekster la urbo pro la t. n. "sankta semajno" katolika, mi esperas ke kelkaj interesiĝantoj pri la temo ĉeestos. Eble mi ankaŭ raportos ion post la prelego.

Aktualigo afiŝita la 4^an de aprilo de 2007: Kiel mi kaj la direktoro de la planetario antaŭkalkulis, ne ĉeestis multaj homoj al la prelego. Krom la dato en "sankta semajno" pri kiu me skribis, alia malhelpa kialo estas ke nuntempe la urba administracio faras laborojn rompante ĉiujn ŝoseojn ĉirkaŭ la planetario, kaj tial presakaŭ ne estas lokoj por parki veturilojn, kio malfaciligas la aliron por homoj kiuj venas en siaj aŭtomobiloj. Nu, malgraŭ ĉio, proksimume 35 homoj (okulkalkule) ĉeestis. Post la prelego, unu el la ĉeestantoj, amiko inĝeniero Dario Valencia Restrepo invitis min kaj la direktoron de la planetario, Gabriel Jaime Gómez Carder, por trinki vinon ĉe Kafejo de Otraparte. Tie ni havis agrablan babiladon pri kulturaj aferoj, ĝis preskaŭ la 11^a ptm. (Tiun-ĉi novan kafejon fondis kaj administras Korporacio Fernando González kiu konservas kaj disvastigas la memoron kaj verkaron de la kolombia filozofo Fernando González Ochoa).