Homoidaj dukruraj robotoj progresas plu!

En la Universitato de Miĉigano (Usono), usonaj kaj francaj esploristoj faris lastatempe rimarkindan progreson rilate la disvolvadon de dukrura roboto, nomata Rabbit kiu piediras kaj konservas ekvilibron simile al homo, tute sen neceso de piedoj grandsurfacaj.
Profesoro Jessy W. Grizzle, kiu kunlaboras en la projekto, klarigas ke Rabbit, en ĉiu kruro ne bezonas piedon: la kruro fukcias kvazaŭ pivoto sur la planko.
La pli bona kompreno pri la piedirada ekvilibro, atingita far tiuj sciencistoj, ebligis fabriki piediranton kiu, se ĝi estas iomete puŝata far ekstera forto, ne falas, kapablas reatingi ekvilibron. Aliaj robotoj atingas similan kapablon sed dependas de relative grandsurfacaj piedoj por eviti falon.
La esploristoj publikigis siajn malkovorjn pri la mekaniko de la homa piedirado kaj ekvilibro en la Internacia Revuo pri Robotika Esplorado. La matematika esprimo de tiuj malkovroj pri biodinamiko estas etigebla al nur du fromuloj, laŭ klarigo de profesoro Grizzle.
La disvolvita kontrolsistemo (kontrolalgoritmo) povas utili ankaŭ por desegni pli perfektajn krurprotezojn por homoj kiuj perdis kruron, aŭ por paraplegiuloj kiuj havis rakian akcidenton.
Detalojn vi povas koni en la paĝo pri la roboto kaj eksperimentoj, de profesoro Grizzle.

Asimo, pli belvizaĝa

Miaopinie, la nuna roboto Asimo de Honda estas bela, havas maŝinan belecon. Hodiaŭ mi ludis iomete per programo Fotoŝop de Adobe por atingi Asimon pli belan, kun homa, virina, beleco, almenaŭ en la vizaĝo. Jen mia unua provo, kion vi opinias?.

Maradona kaj la Leĝo de Kreskanta Interfero

En antaŭa blogaĵo mi montris ekzemplojn de la Leĝo de Kreskanta Interfero, Leĝo kiun mi prezentis en eĉ pli antaŭa blogaĵo.
Nu, mi ĵus legis novaĵon kiu estas alia bona ekzemplo de apliko: la Kreskanta Interfero atingis la faman futbaliston Maradona kaj la katolikajn kardinalojn: La venonta Papo estos, kiel ĉiuj scias, selektata NUR far katolikaj kardinaloj kunsidintaj ene de konklavo. Tamen, nun Maradona klopodas interferi tiun decidon petante publike "Papon kiu eligu la oran tegmenton kaj la riĉaĵon kiuj estas en Vatikano, papon kiu donu manĝaĵon al afrikaj knaboj".
Kiel vi klare vidas, en la nuna tutmonda vilaĝo, la Leĝo de Kreskanta Interfero havas novajn pruvojn ĉiutage.

Kial sekso sukcesas ?

Por reprodukti vivaĵojn, la natura evoluo havas je sia dispono la neseksa reproduktado, kia en unua konsidero aspektis relative pli simpla kaj eĉ pli efika ol seksa reproduktado, en la senco ke seksa reproduktado postulas, minimume, koston en tempo kaj energio por ke paro de estontaj gepatroj serĉu unu la alian. Tamen la specioj kiuj reproduktiĝas sekse estas multe pli nombraj ol tiuj kiuj reproduktiĝas nesekse.
Tiu ŝajna paradokso: Kial aperis sekso kaj sukcesis kompare kun neseksa reproduktado, se la unua estas multekosta?, devus esti kaŭzata far iu avantaĝo de duseksaj specioj super senseksaj specioj. Pri tiu temo skribis, inter aliaj, R. A. FISHER, R. L. TRIVERS, kaj August WEISMANN, sed ankoraŭ, versajne la argumentoj kaj la eksperimentoj ne estis sufiĉe konvinkaj por multaj biologistoj.
Nun, profesoro Matthew R. GODDARD de la Lernejo pri Biologiaj Sciencoj de la Universitato de Auckland, en Nov-Zelando, kaj liaj kunlaborantoj, publikigis eksperimenton kiu konvinkos plu pri la avantaĝoj por pluvivado de specioj, alportitaj far la seksa reproduktado, kompare kun la neseksa reproduktado. La seksa reproduktado estas pli bona por ke iu specio taŭgiĝu al ŝanĝanta medio, kaj iel tiu avantaĝo superas ĝian koston.
Vi povas rigardi resumon en angla lingvo pri la artikolo de la usona scienca revuo Nature.